Wie man lazur scheidet von den steinen, die do heissen lazuli
Wiltu lazur scheiden von den steinen, die lapides lazuli heyssen, so nym die selben stein vnd zu reyb sie klein auf eim stein oder stoβ sie in einem morser oder reyb sie in einer mol sam ein senffmol; dann so hab vil scherben verglisirt, die oben weit sein mit czuzeln vnd nym die selben geriben stein, ye ein hant vol bey einem pfunt in der scherben ein geuβ wasser dar über vnd rür denn das selb vmb, das sich das subtiler auf gebe, vnd als einer mocht einen schret gen, also lang harre vnd geuβ dann wasser lindiglich oben ab in ein andern scherben, biβ das gefellet. Wann es gefallen ist, so geüβ das wasser oben ab, so vindestu lazur auffem grunde. Darnach geuβ mer auf das fürdrige vnd rür alse (// f. 42v) vor vnd hab ein andern scherben, do du das selb ein geüst vnd gefallen lest alse vor, wan es wirt manger ley lazur eine pesser dann die ander vnd halt ytlichs besunder vnd flöse das in vil scherben nach ein ander, als vor geschriben ist, als lang, das du nymer dar ynnen findest, das leicht vnd subtil sey; was aber in dem sande vnd grober materien bleibt, das du nit auβ geflöβen machst, das pring also her auβ; Nym vnd zu reib das noch ein fart vnd hab ein verglasten scherben, der vnten eng sey vnd oben weit, vnd thu die geriben materien dar ein, geuβ darauf warm wasser vnd thun dar ein ein wenig saüffen, das die dar ynne zugath, vnd das das wasser öber die materien gath ij hend oder mynner nach dem aller pesten; darnach (// f. 43r) nym ein kleins subtils pesemlein, vnd das etwas lang sey, oder ist das kurtz, so thu dar yn ein steblein vnd stoβ ye enwenig oder rür auf dem poden, das sich die matery erhebe lindicklich vnd rür das vast vmme oben in dem wasser, als man die erbeβen zu rürt vnd darnach enwenig vnder baβ als lange, das es werde schawmen vnd den schawm samen oben abe mit einem löffel, der da hab vil locher vnthen gestöchen mit einer nadeln etc. vnd versamen den schawm yn ein besundern gefeβ allenthalben, vnd ob das gefeβ schier vol wörde von dem schawm, so spreng enwenig wasser auf den selben schawm, so velleth her nyder vnd darnach so laβ den schawm getrucken vnd was denn pleibt, das ist gut lazur etc