Goldt grundt gummi:
Das erste gummi wirdt genandt Armoniacum.
Das ander Galbanum.
Das dritte Opoponacum.
Das Vierdte Serapiuum.
Das Fünffte Aleopaticum.
Das sechste Asa fetida.
Diese sechs Materien sind alle kleberig und feuchter Natur, darumb hafftet daß goldt gar gern daran, so man sie recht Temperieret, Darumb so nim von diesen sechs stücken welche du wilt den dritten theil, reibe es wol, Und reib dar Zu Zweier als viel reiner kreiden, und als viel Zinober Temperiers darnach mit Eÿerklar wie in den Vorigen angezeigt ist, der nit zu dick noch zu dün ist, streichs an, las wol trucknen, brunier den grundt senfftiglichen, Trage das Gold auff, drucke es nider mit der Baumwolen, so hafftet das goldt im grundt und lest sich gern polieren.
Merck eigentlich Tragantum leg in ein frisch brunwasser ii tag, darnach seud es im selbigen Waßer rur es wol stetigs mit einem saubern höltzlin, streichs durch ein weis tuch, das Behalt, es ist gar krefftig und nützlich den Farben, sonder[lich] aber in den goldt grundt, den macht er starck und gutt so du rechte maß haltest.