Wiltu machen ein gut fundament und assis man dar uff silber leit und golt das es schon und glantz werde
Nim tzo dem ersten pellicarie das ist crid die die kurßner hand dis crid sol man also bereyten vor hin man sol nemen hecht schuppen und hecht gebein von dem hopt und diß sol man under ein ander sieden in eyner uberlasurte kachel (// f.9r) also lang biß das dritteil in gesiedet dar nach sol man die bruge sigen durch ein rein lini tuchlin und rib die vorgenant crid mit der fisch brugi und du es denne in eyn reyn muschelen und la es hert werden unnd wenne du wilt eyn fundamennt machen ze gold so nym der vorgnant bereiten criden als groß als ein hasel noß und rib die gar wol uff einen stein mit dem wasser das mit dem eiger klar gemacht sy und rib dar under och als groß zinoberß als ein erwis und salis armoniacis och als ein erwis und iij blumlin saffrans das es golt glich gel werd das rib alles gar wol under eyn ander uff dem stein und du es von den stein in ein reinn muschel dis sol tu temperieren in der dicke als ein rubrick Dis gehört zu fynem gold