Ze glicher wiß mach man och silber dar uff (// f. 9v) legen das der saffran dar under kum Hie mercke also sol man silber oder gold uff legen in der vorgenante gold varwe und schrib uff das bermit wastü wellest und be sinne ob hin wiebreit der buchstab sulle sin den du wilt ubergulden den buchstaben zeichen vorhin enderlichen und wol mit dem blumbecum und umb vise den buchstaben mit der goldvaruwe gar gelich unnd slecht und schnid din gold in der breitte als der buchstabe sy und nem einen bensel und netz den ein wenig vor uff der zungen und rur das geschnitten golt mit dem bensel vorgenant an ein ende so hastes das gold dar an so für das gold vor en borden ez hinden nieder hang und fur das uff dem bermit hin biß uff den buchstaben so laß das gold senfftelichen nieder sigen uff den buchstaben so zuchet (//f. 10r) die varuwe das gold an sich dar nach buch ein klein uff das gold Also vergulde nach enander als vil du wellest und la das wol trucken werden unnd wenne es wol trucken wirt so wusch das gold hubschelich umb und umb und (sic?) mit boumwollen dar nach so nym ein hurnen plat und leg das under das verguld ding und nym denn eynem wolff zan ader ein bumzan oder eins huntzan und lick das gold senffteclich als lang bis es gnüg glantz werde Hie merck das man das gold breitter sniden sol denne das ist das man verguldenn wil dis ist ein fundament gold und silber nas off zu legen