Wiltu machen eyn fundament gold und silber uff zu legende trucken
So nym ze glicher wis als vil criden als vor und rib das zu glicher wiß als das erst und tu dar under zinober (// 10v.) als gros als ein erwis salis armoniaci och als ein erwis aloepaticum och als ein erwis unnd ij tropffen honigs und rib dis alles gar wol under ein ander mit dem wasser das uß dem eyger klar ist gemachet und temperier das under ein ander in der dickin als ein rubrick ist und tu es dar nach in ein rein muschelin unnd mercke wenne man dis wil uff strichen so sol man es vorn hin wol under ein ander ruren und sol man das berment wol prunieren dar man diß gold varu hin wolle strichen und wenne man die gold varu wölle strichen so sol man sy flos uff strichen unnd gar glich diß ist ein assis unnd eyn fundament silber unnd gold trucken uff zu strichen und zu legen