Wiltu aber gold unnd silber uß der feder schriben
So nim zwenzig pletter fin gold oder xxiiij zu dem meisten und leg die pletter alle nebent ein ander uff den stein und nim saltz unnd uber saltz die pletter uber al dar nach so nym starcken wissen essich und uber sprenge die pletter mit den essich uber al unnd laß es ein wile also ligen und rib es dar nach wol uff einem reynen stein und so iß gar wol gerieben ist so tu es mit einem schuffelin von dem stein in ein grosse muschelen und guß die muschelen vol wassers und (//f. 13v) zertrib daz gold und daz wasser gar wol under ein ander in der muschelen und laß es ein wil zu boden gesitzen und guß denne des obresten wassers von dem gold ab und tu aber ander wasser dar an in die muschelen und laß es aber gesitzen und guß das wasser aber uß von den gold dis tu zu dem tritten mal biß das das saltz und der essich gar wol von dem gold sie geflosset unnd dar nach tu das gold uß der muschelen in ein rein zinin hornlin und nim des vorgnant wassers von dem gummy arabico ein teil und daz ander teil gemeins wassers und musche die ij wasser under ein ander temperier das gold under ein ander und temper da mit daz gold in din zinin hornlin och ein wenig dicker denne/dunne ein rubricke sy und wen du da mit wollest schriben so rur die gulden tinten vor hin gar wol mit eynem reynen holtzlin und duncken dan die federn dar in und schrib da mit was du wilt und (// f.16r )wenne das wol trucken wirt so uber far mit einen zan senffteclichen bis das es glantz gnug werd so wird die geschrifft schon und fin guldin