Wildw mit golt oder Silber aus der federn Schreiben So Nÿm geslagen gold der Nÿm wie vill dw wild vnd legs neben ein ander auf ein reibstain darnach nymb ein scharffen essich tüe darvnder salarmoniak das ist salima vnd las den in dem essig zergen vnd zerreib dann das golt mit dem selbigen essig auf dem reibstain darnach tue das puluer In ein muschel geus lautter wasser daran vnd ruers mit dem finger hin vnd her pis das puluer gesicz an den poden vnd seichs wasser ab tue das ij oder iij mal darnach nÿmb ain weiß aus ainem aÿ vnd temperir das golt da mit das nit zedick noch ze duen sey vnd schreib darnach wo dw hin wild wann es getruckent so magstu di gschrifft palirn mit einem wolf zand so hastu vein gulden geschrifft