Lapp werck
Das lapp sol man zu dem ersten mit eim blý oder mit eim sthöfft entwerffen / also hie stot
(model)
Dar noch so sol man daz löpp vs rissen mit einer federn vnd mit vast düner dinte oder mit dünnem swarczem / also hie
(model)
Dar noch so sol man daz löpp mit eim zan brunieren daz die varwe glatt dar vff ligen werde / nit vast / also hie
(model)
Dar noch sol man es anstrichen mit den varwen ein sit reht / vnd die ander sit ling oder lecz mit eim bensel Item licht rösel vnd grün also berg grün oder schiffer grün / die zwo varwen gehören zü sammen eins licht rösel / vnd den vmslack grün / also hie / oder ein grün vnd den vmbslack licht rösel
(model)
Dar noch so nement satt rösel varwe / vnd vmbrýssen das licht rösel mit dem satten rösel mit eim bensel / zu glicher wise also ob ir es noch einest rýssen woltent vmb vnd vmb daz rösel vssewendick / also hie stot
(model)
Dar noch so nement saff grün vnd vmbryssent das berg grün oder das schyffer grün mit dem saff grün / zu glicher wise also mit dem rösel vmmb vnd vmmb / also hie stot
[Muster]
Dar noch so machent mit eim bensel vnd mit dem satten rösel einen grott mitten durch das löpp das do von lichtem rösel an gestrichen ist vnd mit dem saff grün o(u)ch mit eim bensel ein grott mitten durch das berg oder schiffer grün / also hie stot
(model)
Dar noch so nement aber das satt rösel vnd múschent es dúnne vff der hant ode in einer müschalen mit luterm dúnnen gummy wasser das es zü mol vnd vast dúnne sý / also hie stot [Farbprobe]
Dar noch so nement das selbe dúnne satt rösel vnd strichent es rein mit eim bensel vff daz licht rösel ein sitt gegen dem vmbwurff des blattes oder gegen dem lecz / also hie st
[Muster]
Dar noch so nement saff grün vnd múschent es dúne mit luterm burne wasser vff der hant oder war in wellent das es och vast dúnne sy / also hie [Farbprobe]
Dar noch so strichent vff mit eim bensel vff daz grün / also do hie stot
(model)
Dar noch so nement aber satt rösel vnd temperieren daz mit gummý wasser nit zu starck vnd o(u)ch nit zü dúnne also ein dinte die nit zü dúnne ist daz es vsser dem bensel gange do mit schettewen das licht rösel ab baß vff daz wasser rösel mit cleinen strichelin / also hie stot
(model)
Dar noch so nement daz saff grün vnd temperierent daz mit luterm wasser / nit rürent es mit eim vinger / lant daz saff selbs vs gon daz es sy in der dicke also ein dúne dinte / do mit schettewent daz berg grün baß vff daz wassercht saff grün zü glicher wise also daz rösel / vnd also hie stot
(model)
Dar noch so nement bly wiß daz wol gerýben ist vnd verhöhen daz licht rösel mit eim bensel gegen dem geschettewen teil des blattes oder des löbes vnd so cleiner die ist, vnd die strichel mit dem wißen cleiner sint so es baß stot / also hie
(model)
Dar noch so machent durch den grott der do zwyfalt sin sol do machent mit dem bensel vnd mit dem blý wiß clein dúpffelin dor in / also hie stat
(model)
Dar noch so machent in daz grün öch in den grott dúpffel / vnd do nement wol geryben blý gel getemperiert mit gummy daz es sý das es vsser dem bensel gange daz blý gel sol sin nit des rotten blý gel sunder / des grün var gel daz ist besser vff grün das ist daz best / also hie
(model)
Dar noch so verhöhent das grün lopp vff die ander site gegen der grünen schettewung mit dem blý gel zú glicher wyse also daz rösel mit dem bly wiß / also hie mit bly gel / also
(model)