von dem golt grunt vnd von sinnen gebresten
Item schumet der golt grunt züm ersten So bloßen den schum abe vnd eyges wiß dar úber / oder dünt dar in örsmalcz da von get es ym abe
Item So der golt grunt hert vnd trucken wurt / so gießent luter wasser dar úber vnd lant es weichen / vnd wen es wol ist geweyget / daz merckent ir an dem holcz wol daz dar in ist ob es sich lott bewegen / vnd lot es sich bewegen / So nit rürent es vnder ein / gießent es abe / vnd nement frisch eyges wiß vnd gießen es dar úber / vnd rüren es denne vnder ein schumet es denne / so gießen den schum oben abe / vnd machent do mit waz ir wint
Item ir súllent alle zit den golt grunt versuchen vorhien ob ir in vffstrichent ob er zü starck sy oder zü kranck / versuchent in vff eim zedel
Item ist der grunt zü starck / so ist er zü vast getrencket mit eýges wiß / So lont den grunt geston vnd schutten in denne oben abe vnd gießent luter wasser dar úber / so wurt es güt
Item ist er zü kranck so gießent eyges wiß dar úber daz er reht werde
Item ist er zü dick so merent in mit luterm wasser oder mit eyges wiß dar noch er denne starck oder kranck ist
Item ist er zü dúnne so lont in geston vnd gießen es oben abe daz es reht sy
Item ist der grunt zü viel hert in dem horn so weiche in mit luterm wasser vnd ribent in denne noch einest mit frisch eyges wiß schumet er so blosent den schum abe vnd dunt sust niht me dar zu etc.
Item der golt grunt sol weder zü dick noch zü dúnne sin er sol sin also ein dúne blo daz vsser der federn gange
Item der grunt sol wol trucken worden sin ob ir dar vff verguldent
Item ir súllent öch den grunt nit anrüren ob ir dar vff verguldent
Item ist der grunt zü durre worden vff dem birment das es zü lange gelegen ist ee ir es verguldet hant / so legent es in ein keyler oder an ein fúht stat zwo stunden oder trýe oder úber naht so lot es sich dar noch vergulden
Item den zan súllent ir allewegen suffer vnd reyn halten vúr fetten dingen
Item ir súllent öch den golt grunt den ir vergulden wellen nit berüren mit dem zan es sy denne golt vnder dem zan / in dem vergulden / wan wo der zan vff den grunt rüret do lott es sich nit gern vergulden es sy denne daz golt vnder dem zan