Satt brun oder satt Rösel
Das satt brun oder das satt rösel machent also nement ein lott prysilie geschaben oder gestossen vnd dunt die in ein steinen kruse daz die prýsilie halp an daz mitten der krusen gange vnd nement denne luter starke lo(u)ge vnd werment die daz sie lewe sy vnd gießent sie úber die prysilie daz die lowe ein querg vinger úber die prysilie gange vnd rürent es denne wol vndernander / vnd nement denne vff stunt ein quirnsin gerýbener kride vnd rürent die dar zü / vnd vff stunt so habent ein halp lot gebrant alun vnd den rürent öch dar vnder / vnd nement denne war ob es zü stunt sich vff hebe also es schamen wolt / vnd lont es ston try oder vier oder fünff tage so ir es lenger ston lont so es bruner wart / vnd gießen es denne in ein hertte kride durch ein tüch / vnd lont es trucken / dar noch so riben es mit luterm dúnnem gummy wasser vnd temperierent es öch mit gummy nit zü starck vnd öch nit zü kranck zü glicher wise also daz blo on candit