No title (REC:903)

vier feldunge dar vs daz mertteil alle fendung vs gon
Hie súllent ir mercken So ir wollent ein feldung machen in buchstaben oder in byldung So súllent ir die feldunge vorhien lingieren vnd ie glicher so sie baß stot mitt einer dúnnen wassereht dinten / die nit starck sy / ir súllent öch daz birment súffern mit eim rúcken brosem / ob fyrnis dar vff sy / oder kalg oder kride / wann sollig dinck daz hindert den zan an dem vergulden Dar noch so ir es gesuffert hant vnd gelingiert So úberlöffen es mit eim zan / daz die hor an dem birment sich glich legent / öch so súllent ir den golt grunt in die veldungen allewen anstrichen mit einer federn vnd nit mit eim bensel / vnd die varwen in die feldung öch mit einer federn vnd nit mit eim bensel Ir súllent aber die feldung verhohen mit bensel
O(u)ch so mugent ir gar viel feldung vsser disser feldung bringen mit anderunge der varwen Die schoffzabel feldunge die sul ir lingieren / vnd mit dem golt grunt an strichen vnd vergulden also ir in dissen zweyen ringen sehent
(Model)
Dar noch so nement satt Rösel daz do schön ist vnd temperierent es mit gummy wasser daz es vsser der federn gange / vnd strichent denne úber ort ein linge an / vnd úber zwo aber ein úber ort / also das ie úber ort zwo lingen ler ston vnd dar noch ein linge gefúllet sy vnd aber zwo ler vnd aber ein gefúllet bicz ende vs also hie in dem ersten nehsten ringe es mercklich stot
Und zü glicher wise dar noch in dem ringe dar nebent / so vindent ir also ir im nehsten úber ort ein linge gefúllet hant mit rösel vnd zwo linge hant loßen ler ston vnd daz hant geton vff ein site zu glicher wise So machent dar noch úber ort gegen den lingen aber ein / vnd zwo lont ler ston also ir hie in dem andern ringe findent / daz ie vier blýbent wiß vnd ler ston / vnd nement eben war daz ir nit felent zü strichen / wann also ir hant gestrichen in dem ersten noch gon ringe / gegen der rehten hant also strichent nun in dem andern ringe gegen der lincken hant / also hie vnd nit enahten daz an den enden eis oder zway ler blibent / wann es geburt sich
(Model)
Dar noch so machent aber mit einer federn / blo úber ort ein ler ling vs ie vier an ein also in dissem noch ringelin stot im nehsten / vnd lon aber ein linge úber ort lerston vnd fúllen denne die ander also hie mit blo
Und zu glicher wise so fúllent die úberigen vierbessel vier mit rot vnd vier mit grún vnd aber vier mit grün bicz vs also hie in dem andern ringelin stot
(Model)
Dar noch so nement swarcz vnd lingierent mit einer federn die feldung noch einest daz kien swarcz sol dúne sin daz es gerne vsser der federn gange die feder sol weig sin do mit durchstrichent die feldung rein / daz man vnderscheidelichen daz golt vnd ie varwen sehen múge / vnd machent denne mit dem swarczen in ie daz blo das rot / vnd in daz grün ein crúcel also hie stot in dem nehsten ringel
Und dar noch so nement einen bensel vnd nement bly wiß machent sparren in die rösel varwe vnd ziehent sie zu samen also hie in dem andern ringel
(Model)
Dar noch so nement aber bly wiß vnd machent mit eim bensel in daz blo rösel aso in dem nehsten ringelin stot
Unnd dar noch mit gelem in die roten vnd grünen öch rösel / also im andern ringel stot
(Model)