Von aurum musicum
(N)ement ij lot zyn der do wol ist gelútert vnd dúnt den in ein golt smit tygel vnd lont in wol zergon vff kolen / Vnd nement den ij lot quecksilber der öch gelutert ist / vnd giessent den quecksilber in den zerloßen zyn ob dem fúr vnd rüren es denne vnder nander mit eim trott oder griffel / vnd dunt es denne von dem fur vnd lont es kalt werden / Vnd dar noch so rýben es vff eim ribe stein rehte klein / vnd flössen es denne mit luterm wasser bicz daz es schön do von gang Dar noch so nement es vnd spreiten es an die sunne vff eim brett vff eim bappir oder vff eim off ist es eht kalt vnd lont es trucken werden rehte wol / dar noch so nement ij lot sal armoniacum vnd ij lot leben swebel glich viel die riben öch zü samen / vnd nit vnder den zyn oder quecksilber / also hant ir viij lot zü sammen / vier lot by eim daz ist zyn vnd quecksilber / vnd denne aber iiij lot by ein daz ist / sal armoniacum vnd leben swebel / dar noch so nement ein woge vnd wegent die ersten vier lott zyn vnd quecksilber / sint es denne glich vier lott zü sammen So nement denne die andern vier lott Sal armoniacum vnd leben swebel das es öch vier lott werden / Diß alles zü sammen / zyn. quecksilber. Sal armoniacum vnd leben swebel das sint viij lot zü sammen / Dar noch so nement ein glaß dem man sprichet ein núnnel daz groß / daz glaß beslagent mit lutum sapientie / daz ist leymen mit pferdes mist vnd salcz wol geslagen / den slagent dar vmb daz glaß halp querg vingers dig bicz an den halß / vnd lont es wol trucken / dar noch so nement die viij lott vnd dünt sie in daz glaß / vnd sol daz glaß also groß sin daz die species die viij nit an das mittel des glaßes gangent / vnd machent ein holczen oben in daz glaß / vnd nement denne ein haffen der so groß sy daz das glaß föllig dar in gange / oder ir múgent nemen ein groß scherwen von eim haffen vnd vmbkleiben den öch wol mit dem vorgenannten leymen vnd lont in trucken / dar noch So nement kleinen sant oder gereden esche vnd seczent daz glaß mit den species in den haffen oder schirwen vnd den sant oder die esche dar vmb bicz an den halß vnd seczent diß vff ein triffúß oder vff ein stein vnd machent dar vnder vnd dar vmb für mit kolen züm ersten gar senfft bicz das die species zergant / vnd lont daz glaß oben offen bicz daz kein röch dar vs gange vnd lont es also búrnen in eim steten fúr xij stunden / vnd lont es denne von ym selbes kalt werden vnd brechent denne das glaß vff So hant ir ob got wil güt aurum musicum / Das aurum musicum rybent vnd temperierent also do vornan geschriben stot