Wiltu quecsilber doden das iß hart wirt das iß sich laße tryben mit eime hamer vnd sich laßet smyden So nym czum irsten bly als groß als ein fuste das smelcze vnd als iß dan heyß ist so nym einen senewelen stein vnd drucke yne in das bly das ein grube dar in werde vnd lege ein thuch ubir die grube vnd guß quecsilber dar in als vil du wilt vnd laß das stayn In der heyßen eschen biß das quecsilber hart wirt als czine So nym das quecsilber her widder uß vnde czurslag iß czu puluer vnd lege das puluer in starken eßig vnde sude das mit dem eßige als lange man pleget fische czu sieden adir nym das krüt das da heißet ossenczung das saffe das von dem krude kommet vnd menge das mit eßige vnde mit oley vnd sude das quecsilber da midde so stirbet iß darnach nym sal armoniacum iiii loit czu einer halben maßen eßiges gemengit vnd lege das quecsilber dar in vnd becleybe den deckel wol vmb vnde vmb mit leymen vnd laiß stain acht tage adir czehen So czuhit der gesalczen essig dem quecsilber alle sin vntogent uß darnach nym iß uß dem haffen vnd du iß in ein yseren bücschen vnde vircleybe iß wol mit leymen das du sin sicher sijst vnd lege das in einen wintoffen vnd las iß gluwendig werden dar na du yme ye heißer vnd heißer biß du horest einen clack so ist iß genug Darnach hencke iß uber swebel in einen haffen vnd du den deckel daruff vnd vircleibe iß wol darnach vnd secze den haffen uff heiße eßen adir uff ein glutelin das nit czu groiß in sij dan iß salle gemach warm werden das der swebel rauch moge geben das saltu dune dryßig tage alle tage eins Also ist iß bereyt das iß sich laßet smydden vnde gießen wie man wil