Vil dw gold und silber aus der federn schreiben so nym zo pleter vein gold oder iiij undre zw dem maisten und leg dy pleter alle neben einander auf den stain und uber sal sew allew uberall mit salcz und spreng sew mit scharphem essich uberall und laβ alzo ein weil ligen und reibs dar nach gar wol auf ainem stain und so ez wol geriben ist so thue ez mit ainem schawflein von dem stain in ain grosse muschel vol wassers und zetreib daz gold und daz wasser gar wol under ein ander in der muschel und laβ ain weil ze poden siczen und geuz das obrist wasser von dem gold ab und thue aber ander wasser in dy muschel und laβ aber gesiczsen und geus daz wasser aber auz von dem gold daz thue alz oft bis daz das salcz und der essich von dem salcz gar geflossen sey dar nach thue daz gold von der muschel in ain rain zin horn und nym gumi wasser ain tail und gemains wasser auch ain tail und misch dy (// f. 84r) zwai wasser under ein ander und temperirs daz gold ain wenig dikcher dann rubriken und wenn dw da mit wellest schreiben so ruer dy guldein tinkchen vor hin gar wol mit ainem holczlein und trukch dann dy veder dar in und schreib da mit waz dw wellest und wann dy geschrift wol trukchen wird so uber varb wol mit ainem zand uncz daz dy geschrift hubsch werd so wird dy geschrift schon guldein –