Vil dw pirmet dủrch leủchtig machen welicher lay varib dw wild so nym des lauttern pirmetz so man vindet und wasch daz in lautter laug gar wol wiz dy laug gar chlar von dem pirmet gee dar nach wasch in lautterm wasser so ist daz pirmet lautter und klar werden dar nach reib daz wasser auz dem pirmet wil dw nw daz pirmet gruen machen daz man dar dủrch sech waz man wil alz dủrch ain schon glaz So nym span gruen alz vil dw wild und reibs wol mit essich und misch dar under daz gruen da man mit dy stekel verbt oder daz leder und dy zway gruen misch under einander daz weder zedikch noch zedunn sey dar nach necz daz gewaschen pirmet da mit zepeiden seitten wol und laβ in der varib ligen ain nacht dar nach sweng auz kaltem wasser und spans vast auf ain ram und laβ wol trukchen werden dar nach nym lauttern virneiz daz auz der mastikel gemacht sey und mit dem selben virneiz uber virm daz pirmet ze beyden seitten wiz daz es glancz werd dar nach secz an ein haysse sunn und laz daz pirmet trukchen werden und sneid daz pirmet auz der ram und mach dar auz drew oder vir stukch alz dw es haben wild und legs dann in ain puch daz es slecht werd –