Wil du schwarczen zwierm oder garn värben so nym ain schaf oder ain ander geschirr vnd nym afeylach von eysen oder gestossen hamerschlag vnd strä das in das schaf auf den poden vnd leg dar auf erlem rinten dreyr vinger dick dar nach strä aber mer des hamerschlag daz es die rinten weteck dar nach aber mer Rinten iij vinger tick als vor vnd mer hamerschlag darauf vnd das tuo als lang vncz das schaf vol werd dar nach geuß haiß regen wasser dar auf vncz es über die rinten gee iij vinger hoch an dem dritten tag so laß die varb vnden aus dem schaff vnd geuß sy wider auf die materi das tuo xiiij tag nach ain ander dar nach so mach die varb hais in ainem chessel vnd leg zwirm oder garn dar ein vnd laß ein wall tuon dar inn vnd schwencz aus frischem wasser vnd heng es auf zetrucken ist es nicht schwarcz genuog so stös es wider in die varb als vor vncz es swarcz genuog werd