Wyldu machen gute laka das ist ain varb für die malir die varb mach also nym puochein oder aychein aschen vnd tu als vil kalich dar ein vnd mach ein kaltgoß dar ab aufs hertest du mügst vnd nym dann scherbol von scharlach vnd leg sy in die laug vnd laß sy dar ynn ligen iij oder iiij tag vnd nacht dar nach nym sy vnd tann so nym es vnd tuo es in ainen verglasten hafen vnd secz es auf ain gluot vnd laß es wol erwarmen vnd rür es mit der hant als lang das du vor hicz der hant nymmer erleyden mügst darynn vnd zwing sy durch ein tuch in ein sawbers peck vnd laß es erkalten vnd nym gestossen alaun vnd temperir in mit wasser vnd spreng ein wenigs oben auf das wasser so velt die varb gen poten so geus das wasser her ab vnd nym die varb vnd trücken sy an aim schaden