Item wiltu eyn Lazur kostlicher machen dan vor an der varben daz sy me gilt wann du ij liber vmb j gulden kauffest daz drij dir j liber j gulden gylt Recipe vytrioll salgeme alum de stoeß alle kleyn dar nach recipe aqua vite vnd guiß in dar an vnd las in dar aen sten ij stunt vnd rur is wall durch eyn ander vnd tho is dar nach In eyn kolben vnd destilir es darvon vnd tho is in eyn verglasurtes gescheir vnd guiß j moß aceto vber de matherie id est viteral sal geme alum vnd tho Im wye vorgeschreben van dem aqua vite vnd destilir es auch dar von vnd Recipe rein dar nach j liber lazur vnd tho sy yn eyn glesen becken vnd mache eyn offen vnd setze das dar uff doch so lege zwo yssen stangen ober den offen vnd setze das beckin daruff vnd laes das beckin vnd de lazur waerm werden vnd so es erkalt vnd doch nit gar so Recipe das vor geschriben gedestilirt wasser an vnd guß es dar uff vnd das is gee ein zwerch finger forderlich vber de varbe dar nach setze is weder off den oeffen vnd las is in drucken seuberlichen als stunt is aen der sonnen bys yß durr wyrt vnd erschrindt dar nach guyß des wassers dar aen daz du vur hein gedestilret ist vnd ryb sy woll fuchten dar nach so las sy durr werden an der sonnen vnd ryb sy dar nach trucken So yst sy bereit