Item daz ist die tugend deß zins vnd kecksilber als vil du daz haben wilt Nim halb als vil zin vnd schmeltz daz zin vnd schutt dann daz kecksilber in daz zin vnd lavß es kalt werden so wierd es gar bruchig das leg in ain erdin stain / vnd zerib es wol mitt saltz zuo klainem puluer dar nach wasch es vnd flötz es gar wol mitt haisem essich der starck sy in ainem glatten geschier vnd so daz puluer ze grund siczt so guß dann den essich obnen ab vnd wasch es so lang bys der essich luter wierd vnd klar ab dem puluer gang So saig dann den essich gar wol ab vnd lavß daz puluer trucknen vnd schmeltz daz puluer vnd guß es in ain saltzwasser zwaÿ oder triw mavl / Daz wasser mach also nim guott gemain wiß saltz vnd tuo daz in ainen nuwen hafen der rott sy vnd verklaib den hafen mitt laim der mitt roßmist gemacht sye / vnd secz in dar nach in daz starck fur vf 3 stund biß es zuo hufen flust dar nach nim daz gebrent saltz vnd tuo es in ain glaß in ainem warmen keller vnd dar nach in ain fucht erden / oder in ain kalt wasser So schmiltzet daz saltz an der költen von der fuchtikait vnd wierd zu lutrem wasser. Wiltu daz wasser wass zuo saltz machen so secz daz glaß mitt dem wasser in ain haiß äschen So wierd es wider zuo saltz / Vnd nim dann daz wasser vnd guß daz zerlavsen kecksilber vnd zin dar in tristund / vnd also ist daz kecksilber vnd zin wol gerainget von allen ieren vntugenden vnd wierd hert vnd milt Dar nach nim daz zin vnd daz kecksilber vß dem saltzwasser vnd schmeltz es vnd guß es in ain ÿrde ror vnd verklaib es wol mitt wol beraitem laim vnd dar nach leg es in ain starck fur biß daz ror mitt dem kecksilber vnd zin durch gliend wierd vnd lauß es dar in ligen von morgen biß mittag darnach lavß es kalt werden daz ist dann ain guott allexir vnd nim daz selb ain tail vnd wirff es vf x tail mesß daz wierd edel guot loblich guot silber In aller bewerung gantz vnd gerecht etc