Item nim die blauen kornblumen die nach nit gar vffgangen Sein vnnd Samle Sie morgennß ehe die Sonne auff geth brech die blauen bletlin abe daß die wissen buczlin nicht darunter komen die blauen aber thue in eÿnn mesßin beckenn henckß in eÿnn Sidende wasser bis Sie dur werdenn behald Sie dann in eÿnem glaß oben wol verstopfft So nim der blumen eyn wenick thu Sie in eyn trinck gleßlein, geuß waser drauff daß es werdt wie ein deigk laß es 12 stund zu gedeckt stenn dor nach druck denn Safft durch ein tuch in eÿnn gleßernn gefesß vnnd thu eyn wenig Hornleim darunder stel daz ann eÿne warme steth oder in eyn heÿß wasser biß das es algemach eintrucknet vnnd dick werde dir nach deinem gefallen zu brauchenn