Wiltu auf trücken silber vnd golt oder von farb wie die sey oder derhaben gevertt als der samet vnd was zu ydem gehort, so findestu es alles nach ein ander geschriben
Wie man ab entwurffet plumen oder tier von gulden tuchern
Item wiltu ab entwerffen plumen oder tier von gulden tuchern, da du furm auβ machest, do du mit auf truckest, so nym ein dünns papir, das lauter sey vnd bestreich das mit leinöll an beyden seiten vnd reib er gar wol dar ein mit einem wullen hadern vnd laβ trucken vnd nym denn das selb papir vnd legs auf das tuch, so scheint es dir her durch vnd nym denn ein tintten vnd ein schreib federn vns streich es auf das papir vnd leym es auf ein hobelcz pret vnd schneid es darnach auβ, wie duβ haben wilt