Zu trucken mit papir
Item wiltu pild trucken, die derhaben sein von papir als sie von holcz gesnitzet sint oder geweckβ oder rossen oder ander matery, welcherley sas sey. So nym zween pogen papir oder drey wie vil du der matery geprauchen wilt vnd die zu reiβ zu kleinen stucken vnd thu die in einen saubern hafen vnd geuβ ein kalt wasser dar an vnd setz es zu dem feür vnd laβ es syden zwu stund vnd darnach seyh das wasser her ab vnd pall es dar auβ vnd stoβ sie in einen morser als lang biβ sie bey ein ander beleib vnd nym denn ein form von kupfer oder von pley vnd nym die gestossen matery vnd leg sie in (// f. 23v) die form des ersten gar dünn vnd wenig vnd subtil dar ein darnach ye lenger ye paser alles dicj du es haben wilt vnd stoβ es dar ein mit einer herten pursten vnd nym denn ein warm tuch vnd trück (tünck) es gar hert hinan da mit, so zeucht es die feuchtigkeit her auβ vnd nym denn ein ander warm tuch vier oder fünff fach vnd leg es auf die form oder ticken filtz vnd leg ein pret dar auff vnd leg es vnter ein preβ ein firtell einer stund vnd thu es denn her auβ vnd nym denn einen warmen zigel stein vnd leg in dar auff vnd las in ein weil da auf ligen (// f. 24r) vnd darnach klöpf an die form so schelt es sich her ab vnd wirt scharpff gut etc.