Rot leymbat zu ferben mit prisilg
Wiltu gut leynbet ferben mit prisilg, die bestentig ist vnd nit ab get, so nym zu einem ganczen stuck, das hot xx Nurenberger elen, iij vierdung gallas, ein pfunt alaun, ein pfunt prisilg vnd nym den gallas vnd stoβ in in einem morser klein vnd nym ein loes wasser also vil, das du die leynbet darynnen neczen mügst vnd thu den galles dar ein vnd rür es durch ein ander vnd deuch die leynbat dar ein vnd knocz es gar wol durch ein ander vnd loβ es darynnen ligen ij stundt vnd windt sie denn auβ vnd henck sie an den luft vnd loβ sie trucken werden vnd nymm denn ein halbs pfunt alauns vnd stoβ in auch in einem morser, das er klein werd vnd nym aber ein loes waβer als vil als vor vnd schut den allaun darein. Und nym denn die voringen leynbat vnd deuh sie auch dar ein vnd (// f. 30r) wasch sie gar wol vnd loβ sie auch ligen ij stund vnd windt sie denn darauβ vnd henck sie auf vnd loβ sie trucken werden
Darnach nym ein pfunt prisilg vnd weich die ein in eyn fauls oder weichs wasser vnd loβ sie darynnen sten ein gancze nacht vnd nym denn einen saubern hafen oder keβel, der nit smalczig ist vnd schut die prisilg dar ein vnd geuβ ein weich oder fauls wasser dar an als vil, das du die leynbet dar ynnen neczen mügst vnd nym ein halb pfunt allaun vnd stoβ den klein vnd schub in dar ein, die weyl es kalt ist vnd loβ es syden eyn vierteil einer stund vnd wiltu es probiren, wenn es sein genunck hab, so loβ eyn tropfen fallen auf den nagel vnd neyg den vinger; ist es, das sie nit pald her ab lauft, so hat sie sein genung. Ist sie aber dun vnd lauft her ab, so laβ sie paβ syden vnd seyh (// f. 30v) denn die farb herab vnd geuβ ein ander waβer dar an, als vil al svor vnd loβ es aber syden, als lang als vor, vnd seyh es herab vnd loβ die ped farb sten als lang, piβ das sie kül werden, das du die hant dar ynnen leiden mügst. Und nym denn die leynbat vnd deuh sie in die farb, die zu dem letzten gesoten ist vnd wasch sie gar wol durch ein ander, das sie wol überal naβ werd vnd loβ sie dar ynnen ligen ein halbe stund vnd windt sie gar wol auβ vnd deuh sie darnach yn die ersten varb vnd knocz sie gar wol, das sie wol naβ werd vnd loβ sie darynnen ligen ij stund vnd rür sie zwir oder dreystund gar wol durch eyn ander vnd windt sie den auβ vnd henck sy an den luft vnd loβ sie trucken werden
Wiltu sie aber praun haben, so nym weyt aschen, als groβ als ein (// f. 31r) welsche nuβ vnd würf sie in die prisilg wen sie seutt, so wirt sie schon praün oder zeuh es (es) durch ein frische laugen also truckens, so wirt es aber schon praun etc