Hie ist zu mercken, wie man den cynober machen sol
Item wiltu czenober machen, nym j (swe) teyl swefel vnd stoβ den klein vnd lege den yn eyn tegel auf kolen vnd loβ den wol zu gan vnd nym denn ij teil mercurium das ist quecksilber vnd thu den in den swefel vnd rür es durch ein ander, piβ der mercurius verswindet vnd (// f. 46r) dar nach laβ es erkalten und thu es yn einen verglesten hafen oder glaβ vnd bestreich den eynβ fingers dick mit luto sapientie; das ist mit leymen als die rattsmid gebrauchen, gemacht mit flocken oder har von kulben vnd laβ das loch oben auffen vnd secze es yn ein fewr sublimatoris oder auf ein drifuβ vnd mach zu dem ersten ein kleyns fewr darvnter vnd lege eyn blech öber das loch vnd wart vnterweyl zu dem plech vnd wen das plech nymer feucht ist, so vermache das loch mit luto spapientie vnd mache ein gröβerβ fewr dar vnter auf ij höre oder stund vnd höre nit auf, piβ sich der mercurius nit mer bewege yn dem glaβ oder hafen vnd darnach mach aber ein gröβer fewr, piβ das der rauch auβ gee, des ersten gel vnd darnach plöb vnd darnach rot (// f. 46v) vnd laβ das glaβ erkalten vnd thu es auf, et sic habes