ad temperandum
Wildu plabe tincken machen ze corperiren so nym plab lasur dy klain sey gemalen vnd tů es in ain rain muschel vnd geuβ vber dy lasur ain klain (marge : Aliqui recipe lixinium cum sapone mixtum Item lazurium deinde tere in clarea vel croco addito Item debet lauari et mundari in lixinio uel vrina Item potest ter(er)i in lixinio cum croco) wasser vnd per das wasser vnder dy lasur das es werd als ain taig vnd geuβ dy laug laug vber dy lasur vnd zw treib dy lasur mit dem vinger gar wol vnder ainander vnd laβ es ain weil sten hincz es zw poden vall vnd geuβ dy obern laug ab vnd geuβ aber ain schone laug darŭber
vnd rŭr es aber mit dem vinger vnder ainander vnd laβ es aber sten vnd wenn es gesiczt so geuβ dy laug aber ab vnd tů das dreystund piβ es lautter wirt Zw dem vierden mal so geuβ schon wasser in dy muschel auf die lasur vnd zertreib sy aber mit dem vinger alz vor vnd laβ es aber sten hincz es an den poden gee vnd seich das wasser aber oben ab piβ das nymmer wasser auf der lasur sey vnd nym dann dy lasur aus der muschel in ain hornn vnd geuβ des ersten wassers das vor geschriben ist ain wenig in das hornn das es ain vinger darŭber gee vnd nym dreẙ honigs tropfen das ẙder tropfen sey als ain welsche arbaiβ das rŭr dann alles zw sammen vnder ainander mit ainem rainen holcz vnd tů dy feder darein vnd versuech es ob es aus der federn gee
Hye merk ain wortzaichen ob der tincken recht sey oder nit wann man dy tincken wol rŭrt vnder ainander vnd darnach ain weil plab beleibt daz sy nit pald gen poden velt so ist ir recht geschehen wenn sy aber nach dem rŭren schir gen poden velt vnd nit gernn aus der federnn get so ist dy tincken zw kranck so sol man dar ein legen gummi arabicum als groβ als ain welsche nuβ arbaiβ vnd mer ainen tropfen honigs vnd wann das gummi zeget so ist im rechtz Hy merck wie dy tincken wol gerŭrt wirt schreib damit vnd get sy gernn aus der federn vnd werdent dy půchstaben geleich plab so ist der tincken recht an allen dingen werdent aber dy puchstaben plaich vnd nicht schŏn plab so ist dy tincken zu dŭnn vnd hat ze vil wassers so la das hornn sten ain gancze weil vngerŭrt hincz das dy lasur wol zu poden siczt so geuβ dez obristen wassers ain wenig in der maβ sam dreẙ tropfen vnd rŭr es dann durch ainander vnd schreib damit so wirt sy entleich gůt gecorperirt