parisrot
Wildu machen schon vein parisrot. So můst zw dem ersten ain laug machen aus waydaschen vnd nym ain species dy haisβ lagga damit man das losch verbt daz sol zerstossen zw klainem puluer sein vnd sol dy laug haiβ machen vnd sol des puluers von der lagga in dy haiβ laug rŭren vnd sol das vnder ainander rŭren vnd laβ es sten vnd waichen vber nacht an dem margen sol man dy varb zw dem feur seczen vnd sol sy rŭren an vnderlaβ vnd sol sy sieden halb als lang als man visch seudt vnd sol dann aluminis glaciei in dẙ varb tůn ein setling vnd sol es wol rŭren hincz es zerget Darnach heb dy varb von dem feur vnd laβ sy vber slachen vnd seich dy varb durch ain rain czwifachig tůch jn ain glasirtz kechelein vnd nym dann alawn der gar klain zw puluer geriben seẙ vnd rŭr das puluer lang in dy varb vnd rŭr es als mit ainem loffel hincz das der alawn in der varb well zwergen Hy merck ain warczaichen wann dy varb dick wirt als ein wein vnd doch schon vnd rot ist sol sol man nit mehr alawn darein rŭren Aber wenn dy varb dŭnn ist als ain wasser so sol man des alawn mer darunder rŭren hincz das dy varb schon vnd dick wirt Darnach geuβ dy varb alle in ainen sack der oben weit ist vnd vnden spiczig vnd la den sack hangen vnd trieffen vber nacht hincz nymmer aus dem seck trieff vnd was aus dem sack getroffen ist das ist liecht vnd rot als ain roter wein dasselb sol man ab dem weg giessen vnd was in dem sack beleibt das ist vein rot varb Den sack sol man vmb wenden vnd dy varb auf ainen stain tůn vnd sol mit ainem messer dy varb von dem sack schaben vnd sol dy varb an den wint hencken vnd la sy wol trucken vnd sy rain behalten hincz man ir bedarff dy varb haiβt vein paris rot dy kostleichist dy man vindet vnd dy pest