de blauio colore
Wildu machen vein tunkelplab farb so nẙm in den ersten acht tagen nach pfingsten xij hant voll kornn pluemen dy an dem morgen geprochen sind vor mitten tag vnd prich dy pluemen all oben ab in ainen rainen mŏrser vnd stoβ sy gar wol hincz das sy werden als ain mueβ Darnach leg sy in ain rain leinein tůch vnd truck den saff durch das tůch gar wol in ain glasirtz geschirr vnd nym ain settich salis armoniaci vnd leg es in dy varb so zerget es zw hant Darnach nym ain schŏns gewaschen tŭchlein vnd stŏβ dy tŭchel in dy varb vnd laβ insich cziechen also das dy tŭcher noch zw naβ noch zw trucken werden vnd dach dy varb wol hab empfangen Darnach sol man dy tŭcher neben ain ander hachen In ain trŭcken an den wint vnd la sy wol truken werden Darnach an dem andern margen sol man aber mer der pluemen gewinnen alz vil als vor vnd sol aber oben ab prechen vnd aber stossen zw můβ alz vor vnd laβ durch das czwilch tůch seichen in den kachel vnd nym dann gummi arabicum vnd sol in sĕen das er gar lautter seẙ vnd das sol er wol. waicken mit wasser vnd sol das gummi wol zertreiben mit dem wasser vinger vnd misch das zertriben gummi vnder der pluemen saff vnd rŭr es mit ainem holtz wol vnder ainander vnd alumen glaciei ain settich klain zerriben zu puluer In daz vorgenannten saff vnd rŭr es wol vnder ainander wann das alumen zergangen seẙ So nẙm dy geverbten tŭcher vnd tauch sy zw dem andern mal in dy varb vnd la sy In der varb vnd daz dy varb alle in sich getrucken vnd wol geverbt werden vber all Darnach heng dy tŭcher aber auf an den wind vnd la sy gar wol trucken werden darnach so wind dy tŭcher in ain schŏn papir vnd behaltz in ainer lad vnd secz dy lad enpor an den luft das es nit feŭcht hab