Hie Merckh von dem Auffdrucken,
Wilttu, dan machen auff getruckte dingk, es sei von goldt oder silber, das du vff truckhen willtt, vff tuch oder leder, So Nimb virnis, so du in aller best magst gehaben, willttu von silber vff trucken, so temperier den virnis mitt bleiweiß, wiltu aber von goldt vff druckhen, so temperier den virnis mitt Bergkgeell, vnd wan du also vff druckhen willtt, in ein Ram so zeuch es ahn das es woll gespanett sei, vnd wan du die farb vff streichen willtt, so Mustu haben einander bretth, vnd darnach druckh dasselbig prett, vff die Rechten form das der virnis vmb vnd kom, daruff, da er hin gehört, darnach druckh die Rechte form vff das gewanth, vnd Reib inen hergegen, mitt einem Baumwollen pflasterlein, biß dich dunckhtt das es truckhen worden sei, So Nimb ein hassen fuß, vnd streich daruon, was daruff nitt gehörtt, so ist es gemachtt, vnd gutth,