How thou schalte make cenopere

{f.38v line 11:} How thou schalte make cenopere: take v.
galonis of old urine, and do sethe hit overe
the fyre to hit be clere and welle y-stomyd,
and than let hit kele to hit be lewke-warme;
and than take j li. lake, and breke hit smale,
and serse hit into powdere, and put that powdere
{f.39r:} into the uryne by lytelle and lytelle, and
alwey stere hit welle, and than eft-sone set
hit one the fyre to hit boyle, and than strayne
hit throge a bagge of canvas, so that alle
the drastys byleve thereine, and
thanne eft-sone set hit on the fyre to hit
boyle, and in the boylynge put therein iij.
unce of alome glasse made into powdere,
and alwey stere hit, and whanne hit hathe so-
-dyne awhyle, take hit fro the fyre and
thanne take j. unce, and j. di. of alome glas
molte into clere water, and sprynge of that
water alle abowte, and that schalle gadere alle thy
mater togedyre, and than streyne hit throge
a smale bagge of lynnen clothe, and of the
substance that levythe in the bagge after
the straynynge make smalle ballys there-
-of, as hit were hasylle nottes, and let hem
dry withowte ony sonne or wynd, and
{f.39v:} than take j. li. of turbentyne, and j. li. of
frankencens, and melte hem togedyre, and
put thereto oyle of lynsede, as myche
as nedythe; and thus thou schalt asay iff
hit be welle molte togedyre, take a drop
or ij. of clere water, and sprynge hit thereinne;
and than take a lytelle thereof bytwene
thy fyngyrs, and if hit be holdynge to-
-gedere as gum-wex, than hit is good and
fyne, and if it do not so, put thereto more
oyle to hit be holdynge as wex, and than
let hit kele, for hit is made welle.