Nota hÿ merch auff liecht roslein varb schol man schetwen mit endech daz stat zw ittlicher weis wol und zirleich (//f. 218r) alz bla engelsern Man schol auch mit endich schetwen auff liecht aperment gel das stet ze igleicher weis als gel engelserige Man schol auch mit endich schetwen auf liecht plab lasur daz stet gar zuleich. Man schol auch schetwen auf verger mit gelautterm Ruezz. Nota auf zinober unnd auff ming sol man schetwen mit sattem roslein. Auff liecht roslein schol man schetwen mit paris rot. Auf paris rot mit violvar schetwen. Auf satplaw lasur sol man schetwen mit endich oder mit satt plawer tuchlein varb. Auf liecht grun schol man schetwen mit satt laub gruenn varb oder auff gel schol man schetwen mit laub grun var oder mit roslein oder mit paris rot. Nota hie gar eben alle dÿ varb da man mit schetwen schol dÿ schullen sein unvermischt und sat seyn in selber Nota alle dÿ varb dÿ man wil haben liechter den sÿ an in selber fint under dÿ schol man mischen pleibeÿs als groz als ain arbais und temper daz underainander uncz daz im recht gescheh.