Wil dw silbreyn schrift haben so nim Marca sitam argenteam und ze reib daz mit wazzer gar wol und chlain und si es ze riben ist so tw es von dem stain in ain schon mischelen und geuz dÿ mischel voller wazzers und rurs mit ainem vinger wol under ainander und laz es ain winig zw poden siczen und geus den des obrigen wazzers ab von der mischen und tw aber mer wazzers dor in und ruer es aber underainander als vor und laz es aber enwinig siczen und geus das ober wazzer aber uncz daz es lauter werd und nim denne des wazzers von gummi arabico ain tail und das ander tail gemains wazzers und misch dÿ zwaÿ wasser undereinander und temper ze gleicher weis in der dick als eÿn rubrick und schreib da mit waz dw wilt und la das trucken und brunir es senftichleich mit einem glatem wolf zand so wirt dÿ schrift schon und glancz und silber var