Wil dw aber golt und silber auz der federn schreiben So nim zwamczig pleter vein golt oder iiii und 20 zw dem maistem und leg die pleter alle neben einander auf den stain und nim salcz und ubersalcz die pleter uber al dar nach nim scharphen weizzen ezzeich und uberspreng die pleter uber und laz es eÿn weil ligen und reib dar nach gar wol mit einem stain und so es gar wol ze riben ist so tue es mit einem schaufflein von dem stain in ein groz mischel und geus dÿ mischel voller wazzers unnd zetreib daz golt und daz wazzer gar wol undereinander in der mischel und laz es ein weil ze podem siczen und geuz den daz obrigst wazzer von dem golt ab und tw aber ander wazzer in die mischel und laz es aber gesiczen und geus daz wazzer aber aus von dem golt daz due zw dem drittenmal pis daz das salcz und der ezzeich gar von dem golt seÿ geflossen und dar nach dwe daz golt von der mischel in aÿn raÿn zinhornlein und nim daz vorgenant wazzer de gummi arabico ein taÿl und des gemaÿnen wazzers ein tail und misch dÿ zwaÿ wazzer under einander und temper daz golt da mit in dem zinhornlein auch ein winig dicker den robrick und wen dw da mit wilt schreÿben so rur dÿ gulden tintten vorhin gar wol mit ainem raÿnen holczlein und tunck den dÿ feder do eÿn und schreib dar mit waz dw wollest und wen die schrift wol trucken wirt so uber var sÿ mit einem [huncz (durchgestrichen)] zant uncz die schrift hubsch werd und schon und gulden.