Wil dw parmet durchleuchtig machen welcher varb dw (//f. 224r) wilt als ein glas so nim des lautriste permacz den man vindet und wasch daz in lautterm wasser laugen gar wol pis dÿ laug gar chlar von dem permait get dar nach wasch es in lauterm wasser so ist daz permait lautter und chlar worden dar nach reib daz wasser auz dem permait Wil dw nun daz daz pirmait vein schon grun werd daz man dar durch sech waz man wil alz durch ein schon glaz So nim spon grun als vil dw wilt und reib daz grun iar wol mit ezzeich und mische dar under dez grun da man mit die seckkel verbt oder daz leder und dÿ zwaÿ gruen temper undereinander daz es weder ze dick noch ze duen werd dar nach nim dez gewaschen permacz und necz daz permait zw paider seÿten wol und laz es alzo ligen in der varb ein nacht dar nach so wasch daz permait auz chaltem wasser und spanne daz permait vast auff eÿn ram und laz es wol trucken werden Dar nach nim lautterm virnecz daz aus der mastikk gemacht seÿ und mit dem selben virneis ubervirneis daz permait ze peiden seÿten pis daz es glancz werd dar nach so secz es an ain haizzen sunne und laz daz permait wol trucken werden dar nach so schneid daz permait auz der ram und mach dar auz iii stuck oder vier alz dw es haben wilt und leg es danne in ein puch oder in ein prieff daz es schlecht werd.