Zinober zumachen
Nym j theil schwefel, zerstoß in clain, leg In Inn einen tigel, auff kolen laß in zergeen, dann so nem 2 theil mercurij, schut den In den schwebel vnnd ruer es durcheinander bis der mercurius verschwindt, so laß erkalten Vnd thu es Inn ein glas oder verglasten hafen, verstreich den mit luto sapientie, vnnd laß daz loch oben offen, Darnach setz es Inn furnum sublimationis, oder auff ein drifus in kolen mach zum ersten ein clain feur darunder Vnnd leg ein plech vber das loch vnd wart vnderweilen Zum plech vnnd wann das plech nymer feucht ist, so vermach das loch, mit luto vnnd mach ein groß feur darunder, auff zwu vrhe, sunst steter hohe, bis sich der mercurius nit mer rege Im glas, so mach aber ein groß feur bis der rauch auß geet zum ersten gelb darnach plau vnnd zuletzst rot, dann laß das glas erkalten, vnnd prichs auff so hastu schönen Zinober