Ein annder Zinober
Nym 2 tail quecksilber, 1 tail lebendigen schwebl den thu Inn ein glesin kechelin, setz den auff ein glut laß langsam zergen, nym dann das quecksilber, thu es Inn den schwefel, Riers mit einem holtz schnell durch einander bis es hart wurt, Reib das auff eim stain zu puluer thus in ein glas, das ein halß habe einer spann lang, oder lenger, das glas soll geclaibt sein mit laime eines fingers dick, setz es dann auff ein drifus auf gluende kolen, verstopffs oben wol bis es erstlich langsam warm werde, auff ein halben tag, Darnach gib im ye bas vnd bas kolen, bis auff den abend bis du sihest ein Roten rauch zum glas außriechen mit einer Roten flammen, so hats gnug geprant. Darnach setz vom feur, laß vom Im selber kalten bis auff den morgen, darnach prich das glaß auff so findest du Zinober.
Item sunst hab ich funden an eim ort, das man nempt 1 theil quecksilber vnd 2 theil schwebel, vnnd macht es In massen wie negst obgemelt