Ein annder plaue lassur
Nym kyrsenpech zerlaß es fein sitlich darnach nym darzu das driteil mastix vnnd ein wenig augstain vnnd ein wenig bomöll, das alles laß mit ein ander fliessen, Wann du dann lassur beraiten wilt, so nem das obgemelten ein teil, Vnnd des stains lassurium clain geriben auch j teil Also soll man das beraiten man soll den clain geriben legen In Reverberationis das haist ein glaß offen vnnd wann das glut rot wurt, so soll man es werffen In ein scharpffe laugen, die gemacht sey von kalck vnd aschen, vnd darin auff ein gute stund gesotten, darnach soll man es werffen Inn ein rains pech, vnnd laß es darin gefallen vnnd wann die laug gar lauter ist so geuß sie gemelich ab dem puluer, dann nem das puluer vnd reibs gar wol auff eim stain Alß dann so wurff die erst gemelte materj zu dem gepuluerten stain reib das vnnd Incorporieres wol zusamen darnach thu es in ein rain pöck, geuß haiß wasser darauff vnnd ruers wol vntz das wasser gantz plau wurt, so geuß bald ab vnnd laß gefallen, das das wasser oben gar lauter wurt, geus es dann aber ab, so findest du dann fein plaue lassur am poden das ist dann groß golds wert Zum andern leg die materj In wallendes wasser vnnd geus es auch ab vnnd thu im als mit dem ersten, so lang vntz das wasser ganntz weiß herab get, Also ist die lassur gar auß gezogen, das erst.
Das erst lassur ist dem gold gleich In seinem Wert, Das ander ist minder, vnnd das drit aber minder vnnd ist auch gut ann das gemeur.