Ein annders spongrien
Nym Kupffer plech, vnnd purgier sie schön, darnach nem atrament, reib die mit harn auff einem stain, vnnd bestreich die plech allent halben darmit, lasse sie dann trucken an der sonnen, darnach lege sie in ein verglasten hafen, setz in Inn Kolen, vnnd laß sie wol erhitzen auff 2 höhe, vnnderweilen thu den hafen oben auff, vnnd wenn du schwartzen rauch sihest, so laß es erkalten vnnd thu den hafen auff, nym plech heraus vnd puluer sie mit den henden, vnnd welichs sie nit will lassen puluern, dem thu In allen sachen wie uor, bis es sich puluern last, darnach wasch es mit warmem wasser, oder mit harn In eim pecken, laß darnach wol gefallen, so felt das kupffer zu grundt, vnnd das atrament schwembt ob, das geuß ab, vnnd laß das kupffer trucknen an der sonnen, darnach nem des selben puluers j pfund, vnnd 4 pfund gecalitionerten weinstain reib die 2 mit einander mit kindsharn vnnd laß es trucknen, darnach leg es In den ersten hafen, vnnd prenns als vor mit eim starcken feur, bis du grienen rauch sihest Darnach laß es erkalten vnnd prich den hafen auf, so hastu schon grien.