Ein annder spongrien
Nym kupffer vnndt schneidt es zu stucken, die 3 finger prait seindt, vnnd mach durch yedes ein loch, vnnd nem dann ein pret, das scheiblecht ist, daran bind die stuck alle vnnd hencks In ein verglasten hafen, da guter essich Innen seÿ, vermach in wol mit mist, setz In Inn ein warmen mist, j monat, darnach nem eines aies weiß, temperier das mit saltz, das es dick werd, thus dann In einen hafen, In mist laß aber 4 wochen steen, so hastu gut spongrien [Nachtrag:] Du must mit der temperatur die plech bestreichen, vnnd nym allwegen vber 4 wochen farb ab, das thu weill die plech weren