Ein annder pleyweiß
Nym pleÿ als vil du wilt vber schabs zu beden seiten, die obersten haut herab, schneid lameln 3 finger prait, vnnd einer spann lang oder lenger, vnnd mach durch yede lamel oben ein loch, zeuch ein schnurlin dardurch, vnd sich das du habest ein aichen feßlin, oder ein hafen der 3 spann lang seÿ, vnd ein reinn lid hab, vnnd henck die lameln zu rings vmb Inn den Hafen, vnnd thu 2 maß gutz essichs Inn den hafen, vnnd wurff ein handuol saltz darein, vnnd ruer es auff dem feur durch ein ander das siedig haiß werde, deck den hafen wol zu, setze In an ein warme stet 10 tag, darnach thu die deck herab, die lameln heraus, so findest du an yeder lameln zu baiden seiten eins fingers weisse farb, die soltu nemen mit einem messer, thu sie Inn ein Rain geschirr, henck darnach die lameln wider Inn den Hafen als vor, vnd deck in, setz den hafen wider an die warme steet, vnnd merck ye vber den 10 tag nem farb ab, henck die lamel wider ein, bis du der farb gnug hast, nym dann die farb zusamen Inn ein merser, geuß ein wenig wasser daran, vnnd stoß der farb wol ein halbe stundt, bis es wurt ein dicks muß, vnnd thu die farb dann mit eim Loffel Inn ein hafen, oder 2, setze an die sonnen, vnnd laß es hart werden, so ist sie berait, vnnd merck alle wail das pley wert, soll mans einhencken, Ists das der essich schwint so mer Inn