Wie man pleyweiß machen soll
Nym pleÿdafeln, dreyer finger prait, einer spann lang, so uil du wilt, schabe die lameln zu beden seiten, die eussersten haut herab, vnd durchlöcher sie vnnd hengk die mit dreten Inn ein hafen 3 spann lang, der wol weit vnnd guter essich darrynnen sey, vnnd wolgesaltzen auff 2 henduol, darmit mach die lameln all naß, vnnd deck den hafen mit einer sturtzen wol zu vnnd laß in bey eim feur erwallen stell In 10 tag oder lenger ann ein warme stat, prich in dann auff vnnd nem die lamelnn zu beden seiten, vnd nem die farb mit einem messer herab, Inn ein sauber geschirr, henck dann die lameln wider ein vnd thu Im als for, vnnd nem sie vber 10 tag heraus, schab die farb ab, das thu bis du der farb gnug hast, darnach so stoß die farb mit ein wenig wasser In eim morser, das es werd als ein muß, dann nem sie vnnd mach ein klotzen daraus vnnd trucken den ander sonnen, so wurt es geplaicht vnnd ganz hort, vnnd du solt sie alle abend besprengen mit wasser auff 14 tag, hengk das pleÿ ein weil es wert, vnnd mer den essich ye zu zeiten,