Ein Leym der Enten vnnd ander groß fohgel im wasser helt
Nym kibelhartz einer baumnuß groß, virneiß ein halbe nußschal uol, Leinöll 2 mal so uil, Als terpentin so uil als des leinols vnnd virneiß gewest ist, das alles thu Inn ein pfannen die yrdin ist, laß vein sitlich ergreen, dann dann nem ein halbe acht maß vogel leim misch das wol durcheinander, dann es lasst sich ungern zusamen rueren, das soll mit eim breiten holcz geschehen, thu In dann In ein Kachel vnd behalt in an einer kuelen stat, vnd ye lenger er stat ye pesser er wurt, vnd so du den prauchen wilt, mach In warm, vnnd zeuch ein zwifahe schnur dardurch, die im rach gehangen sey, vnnd knipff klaine flos hölcz In die schnur zwu spann lang von ein ander, vber zwerch, so der leim an den henden fast hanget, so wasche sie mit baumol mit kleyen vermischt.
Item ein schop leim ist ein vierteil einer maß, 1/2 schop ist ein achteil, Setz den ein tag vnd ein nacht hinder einen warmen ofen, In einem lauwen wasser, In eim neuen geschirr, zeuch In offt durch einander, zu morgens seud in trucken, rier In fast wol, das thu 3 mal, dann prenn haber stro zu aschen, vnnd ferb den Leim damit so scheuhen die Enten nit darab,