Ein andere In der not mit fingelnrotenn
Nym 2 oder 3 löffel vol milch, thus In ein schusseln nym dann ein plauen wetzstain der da wol gepraucht seÿ, setz den mit einem ort Inn die schissel, vnnd nem ein wol gepranten Coln, tuncke In Inn die mylich, vnnd Reib in auff dem wetzstain auff der seiten da man vil gewetzt hat, dunck den kolen offt hinein in die milch, das thu solanng bis sy schwartz gnug wurt nach deinem gefallen, du must aber dise dinten bald verschreiben, dann sie pleibt nicht lanng
So du aber fur die mylich keß molcken nympst, vnnd sand den man vnder den schleiffstainen findt, gelegt wurt, vnnd darnach mit dem kolen vnnd wetzstain wie oben berurt beraitest, so helt sie sich lennger vnnd ist ein gute schwartze dinten