Wie man Goldt vnnd silber grundt machen soll
Wie man gold vnnd silber soll aufflegenn truckenn oder naß es sey auff Pergamen pirment papir oder auff geschniten holtz
Nym erstlich waiche kürßnerkreiden als vil du wilt prens Inn haissen kolen, vnnd lesch ab mit essich da ein wenig honig Inn zertriben sey laß also sten so wurt die kreider mürb, vnd milt von dem prandt, vnnd von dem essich vnd dem honig, vnnd nem die kreiden wider auff aus dem essig vnnd reibs auff einem stain, mit airclar da gumj Innen sey vnnd nym zinober vnnd 2 mal so uil lapis emartritz Reib das gar wol vnnder einander, thus vom stain In ein muschel oder auff ein pret, vnnd mach ein heufflin oder zway darauß vnd laß es hert werden ann der sonnen, vnd behaltz, behaltz, bis du sein bedarffst, darmit mag man verguldin wie hernach volgt