Volgt wie man federn pergamen papir bain vnd holtz mancherlay farben ferben soll
Wie mann die federn zum ferben zurichten soll
Nym die federn vnnd schab die herlin fein ab, mit einem scharpffen messerlin, vnnd wisch oder reib sie wol mit einem wullen tuch, damit die haut an dem kilen sauber abkompt glat werdt schneid auch vnnden das spitzlin, das die farb darein mug komen Lege sie dann Inn alaun wasser, laß ein halben tag darynn ligen, thus dann heraus vnnd laß trucknen, Darnach ferbe sie Vnnd wann du sie dann, nach hie unden gelerter weiß, geferbt hast, lasse sie wol trucken werden, bestreiche sie dann fein dynn mit maller virneyß, wie hie vornen In disem puchlin geschriben steet mit 2 finger, stecks dann Inn ein pret voller locher, Also das kaine die andern Riert vnnd laß trucken werden ann einer stet, da es nit staubig sey.