Wie man Den waid ansetzen vnnd wülle vnnd leine plaw daraus ferben soll
Berichtung waid annzusetzen
Wann du waid ansetzen wilt, so merk zum ersten dise puncten, Ein besunder warm stublin wer allerbest, darumb gib achtung das die farb nit erkalt, Laß dir machen ein besundere brenten, von daufeln einer zwerch hand dick, vnnd auff 40 Pfund garn es seÿ wullj oder leine, soltu ungeuerlich ansetzen vnnd nem wie hernach volgt,
Nym j metzen oder ein viertel Rugken kleib oder weniger, j vierdung weinstain, laß das ein gute stund mit wasser sieden, darnach geuß In die gemelte prennten, mach die wol zu, mit einem gefuegten pret darzu gemacht, daruber leg ein guten tepich vnd pind den mit einem strick zu der prenten, Auch schut zuuor den waid ein metzen oder 1/2 darein, Darnach nem 4 1/2 Pfund waidaschen, vnnd thu erstlich ein pfund daruon Inn die prennten, Rier sie wol mit der schaufel, darnach laß wider zugedeckt ein gute stund Ruen, Alßdann Ruer aber 1 1/2 Pfund waidaschen darein, laß mer ruen wie uorhin vnnd zum driten Ruer die vberigen 2 hauch darein, vnnd laß dann Ruen 1/2 nacht, oder bis In 6 stundt, darnach du vil ferben wilt, ye mer ye lenger, oder so lang bis die farb wol auffgat, gleich einem taig, Alßdann nem ein steblin und Ruer die farb geschwindt darmit, damit sie vil plomen gewynne, sauset aldann die farb fast, so ist sie gerecht darauß zu ferben, wo nit, so ist sie nit gerecht, darumb deck die farb wider zu Vnnd laß sie lenger ruen, vnnd wann du ferben wilt, so mach In die pränten ein güter, auff das du nit zu grund Rierest, mit das du ferben wilt, Alßdann so ferb auff ein mal nit lenger auß der farb dann ein stund nem In die hand ein grosse handuol, treib die In den henden vnnd in der farb vmb, bis sie gut plaw werden, vnnd wann du ein stund geferbt hast, so laß die far ein stund ruen, vnd darnach aber ein stund gerferbt, und laß aber wie vor ruen, das treib so lang die farb gut ist, vnnd wann die stund zu ferben kompt, sollen vil person darzu sein, vnnd Auß disem waid magstu ferben, garn, tuch es seÿ wullj oder leine, wollen vnnd was du wilt