Exempel der waidt
Item ich peter otth hab an gesetzt ein klain feßlin, darzu hab ich genom 1/2 pfund, ist geschehen zwischen 4 vnd 5, da ist das feßlin mer dann halbuol zugossen worden, darnach also vngeruert gestannden, bis an morgen, zwischen 6 vnd 7 hab ich in ab der waid gossen, vnd In wider warm gemacht, er ist aber vor schon zeitig worden, vnnd siedig haiß widerumb an die waid gegossen, vnnd allen zusatz, darnach hab ich im geben aschen vnd wein heffen, welichs auff ein loffel vol komen, darnach geruert es widerumb zu gedeckt, vnnd ist also gestanden bis zwischen 8 vnd 9 ist geruert worden vnnd gespeysset, vnnd widerumb zugedeckt, wieuor, vnnd ist also gestanden bis zwischen 11 vnd 12 da ist er widerumb geruert vnd gespeiset wie vor, vnnd ist darnach gestanden, bis zwischen 3 vnd 4, ist er zu gossen worden vnd also plieben bis am morgen, vmb 5, da ist er gewermt worden, vnnd widerumb angossen, vnd also gestanden j stund, darnach gearbait.