Schwartz auff plaw zu ferben
Wiltu wullen tuch auff plau schwartz ferben so waid anfengclich die tuch, auff das sie plau werden, spiel sie nach dem waidt, darnach gerött, darnach galliert, vnnd zum letzsten geteuffelt, das ist gar aus gemacht, das soll 2 mal geschehen auff ein yetlich mal sein anzal kupfferwasser geben, vnnd dann auch abkielt
Item die schwartze tuch zu Reten, zeuch sie nach den Rotten tuchen durch die selbe nachfarb
Item sie schwartze zu zu galliern, Nym vf ein tuch ein mitlin gehackt holtz, laß darin sieden 1 1/2 stundt darnach legs an die Erdt vnd kiels ab, Inn diß wasser oder prue soll gethaun werden, ein schefflin mit kupffer wasser, laß es wol sieden ein halbe stundt, du alßdann das holtz das grob ist wol heraus thun, ee das kupfferwasser darein kempt nach der halben stund thun thon sie heraus vnnd kuel sie auch auff der erden ab, Nach dem kieln laß sie wider Inn den kessel, laß es wider sieden ein halbe stundt, thun vor ein schefflin mit kupffer kupffer wasser darein, vnd wider abkuelt, darnach geweschen so seind sie berait
Das gat auff zway tuch