Goldgelb zu ferbenn
Erstlich sollen die tuch gesotten, Inn alat wasser wie uorstat beÿ den 1 1/2 stundt, darnach gegilbt vnnd darnach geret, 31 pfund ret soll auff ein tuch genomen werden, den kessel mit lauterm wasser gefilt, darnach soll darein gethon werden 18 pfund gelb prisilgen holtz, vnnd ist gerecht nach der prob, als offt es ein farb an nempt soll es gespielt werden,
Item du magst goldgelb auch ungeret machen, so es es erstlich gesotten ist worden, so fill ein kessel mit wasser, thu darein ein korb mit Rettÿ vnd das obgemelt gewicht prisillgen holtz, vnnd thu darzu 3 gaffet weinheffen laß wol sieden, vnd leg das tuch darein auff 1/2 stund, zeuch es dann auß, vnd laß widerein bis es gleich gnug hat, das prisilg holtz soll sein 28 pfund, stet sonst 18 pfund.