Ein Baytz zu machen Zu allen hievorgeschribnen farben
Item dise nachuolgende paitz, magstu prauchen auff tuch oder garn Zu allen hie vorgemelten beyfarben, darin soltu sieden dein tuch oder gar, laß wider trucken werden, darnach ferbs auß welicherlaÿ farb du wilt, so nempt es die farb dest lieber ann, Darzu Nym 6 maß regen wasser, Inn ein kessel, vnnd ein schiffel vol Rugcke kleyb, laß das mit ein ander erwallen, vnnd thu darein 6 lot kalmas vnnd 3 lot weinstain, laß aber mit ein ander wallen, darnach seyhe es durch ein leine tuch, Inn einen hafen, wol vermacht, setz in ann ein warme stat 9 tag, so veriirt die farb was du fur tuch oder garn darInn baitzen wilt, das seud darInnen,
Oder seud das, so du ferben wilt, zuuor Inn alaun wasser laß trucknen, vnnd ferbs dann, wann wo nit alaun In ein farb gethon worden ist, so muß man das tuch oder garn Zu In allaun wasser sieden wie yetz gemelt