Wie mann Semisch Leder Gerbenn vnnd machen soll
Semisch leder zu machen, Nym die fel vnnd durchwaich sie, darnach nem sie auß dem wasser, vnnd stoß das här mit dem eisen herab, darnach wynnd das wasser wol daraus, Darnach so nem zu 10 schafffeln, oder gaißfeln, oder 5 kalbfeln, Oder aber zu einer hirsenhaut j pfund alaun, j pfund puter, j pfund saltz vnnd 20 air, darzu nem wasser so uil du sein berdarffest Also das die heuten naß werden vnnd bedeckt sein, Darnach thu das saltz, schmaltz vnnd alaun darein, laß es sieden bis das alles wol erzergangen ist, hebs alßdann herab, laß erkalten, so lang bis dus an den henden erleiden kanst, Darnach so thu die aier darein, vnnd setz mer vber das feur, vnnd thu die feel Inn ein sunder gefes, vnnd so der zeug geschmoltzen ist, so geus in an die fel vnnd Arbaits wol vnder den henden vnnd truck denn zeug ungeuerlich 10 mal auß den felen, thu In allwegen wider vber das feur, laß Laß in warm werden, vnnd arbait die fell aber darynnen, das thu so lang vnd vil, bis du den zeug allen Inn die fel verwurckst, Darnach hencke die fel auff laß sie trucken werden, zeuch sie aber außeinander am auffhencken, vnnd hencke sie an kain sonnen, so hastu gut semisch leder probatum est
Wiltu sie aber gell haben, so thu gele kreiden darein.
Wiltu sie dann grien haben, so thu gestoßnen grienspon darein, wann du den zeug schier gar In die fel gearbait hast.